إليوم نجحت لـ وئام رابح

إليوم نجحت
بعد ماعديت أربعة سنين فالفاك خرجت
خرجت وكايني عمري مادخلت
خرجت ب……
باش خرجت ؟

باش وصلت نجحت وعملت إلي عملت
حتى واحد مايعرف بشنوة تعديت
حتى واحد مايعرف قاده من مرة بكيت
وإلا قداه من مرة تحط وتكربست
قداه من صاحب غدر وعديت

حتى واحد ما يعرف قداه من مرة مت فيها
حتى واحد مايعرف وقتاه طحت و وقتاه قمت
حتى واحد مايعرف علاه ديما نتبسم كي نبدا وحدي
وعلاش نضحك ومخي مش تحتي

حتى واحد مايعرف كيفاه عشت
قداه عانيت
قداه عديت
قداه من مرة طلبت السماح من عبد غالط باش مايمشيش

حتى واحد مايعرف شنية حلمت
وين وصلت

حتى واحد مايعرف تعبي
مرضي
قوتي
ضعفي

يمكن شافوني خيال
عرفوني تصويرة
وحفظوا إسمي كي سمعوا أمي تعيطلي

يمكن يعرفوني وين قريت
شنية قريت
ومع شكون قريت

يمكن يعرفوا عايلتي
صحابي
والطفل إلي مشى بعيد وخلاني

يمكن يعرفوني نضحك
انجز
نلعب ونجري

أما لحقيقة مايعرفوهاش
لحقيقة إلي بيني بين روحي
مايعرفوش حياتي
لا صحابي ولا حبابي
لا عركي وقاعدتي
لا دموعي وحكاياتي

لا مايعرفوش الحاجة إلي تفرحني
مايعرفوش الحاجة إلي تخوفني
ما يعرفوش الحاجة إلي توجعني

لا لا مايعرفوش الجوجمةفي مخي
إلي عايشة بها وفيها
صباحاتي وعشياتي
وعقاب الليل ووجوه الفجاري
وكل وقت
وكل بلاصة

حتى واحد مايعرف شنية فما بعد نص الليل
وقت المخ يسرح يسار ويمين
وقت العينين تضبب وتضلام
وقت القلب يدق كاينو من بين ضلوع خارج

وقتها نتذكر
نتذكر إلي تعديت به لكل
نتذكر الثنين وعشرين سنه لحظة بلحظة
نتذكر أول صاحب عملتو
ونتذكر طفل إلي حبيتو ومشى
نتذكر صحابي إلي باعوني
نتذكر أمي وستراس القراية
نتذكر أختي وتكريز الدار
نتذكر خويا إلي مشى وفالخراء خلاني
نتذكر الفقر واللي انا نحب على ميات حاجة
نتذكر الموت قداه من واحد هزت

نتذكر نتذكر نتذكر لين نكره روحي
نكره عيشتي
نكره عباد كانت نهار مزينة حياتي
ونكرز ونرجع نتذكر

نتذكر قده من مرة الدنيا تسكرت عليا
ضياقت بيا
وظلامت في عينيا
ونلقى روحي محصور بين أربعة حيوط
حيوط بتي
بتي إلي دفنت فيها روحي ثنين وعشرين سنه
البلاصة إلي عشت فيها مرتاحة
إلي ما نرى فيها حد
وما نحكي مع حد
البلاصة إلي فيها كتبي وتصاوري
فيها حلماتي وحكاياتي
بتي إلي ياما حكيت لحيوطها همومي
ياما المخدة نشفتلي دموعي

بتي إلي تعرف جروحي في بلايص من بدني مش ضاهرة
وجروح قلبي إلي طال عليها زمان

نلقى روحي طايرة
ونقول تو يجي نهار وعلى ساقية ناقف
تو يجي نهار ونخرج للشارع
نقابل لعباد إلي كرهتها وحبيتها
نرى لوجوه إلي نسيتها

نتفكر ونخمم ونخمم ونتفكر
لين عينيا تتغمض
ونرقد ونقوم ونرقد
وغدوة وبعدو وبعدو ومانخرجش
خاطر نخاف نخرج
أما باقي نستنى ف حد يدق عليا الباب
نستنى في حاجة تجي تخرجني
تخرجني وتحل معايا البيبان إلي تسكرت

باقي نستنى خاطر مافما حتى واحد بالحق يعرفني
يعرف حقيقتي ومخي
يعرف خيالي
ويعرف شنية مخبية ورى ضحكة

حتى واحد مايعرف عليا حتى شي

-وئام رابح –

Publicités