قداش نتولدو من مرة .. ؟

قداش نتولدو من مرة .. ؟
نتولدو الف مرة و مرة
نتولدو في اللحضة المرة
نتولدو بالكلمة الحرة
نتولدو مرة كي نقابلو الدنيا
نتولدو مرة كي نحبو و المشاعر فينا يدبو ودقات القلب يعدو في لحضات الولادة ..
نتولدو مرة علی الركح .. بالفن يتدفن الساهي يتولد الزاهي الباهي .. تتمحی الذكرة و الفكرة الخايبة .. يتعرا المخبي في قاع الخابية ..
نتولدو مرة في الغصرة كي ما تلقی حد ..
العصرة ورا العصرة و يبدا النكد ..
نتولدو مرة مع الكذبة و الغدرة ..
في نفس المرة مع الغفلة و الرقدة ..
نتولدو مرة مع الفرحة بعد التعب..
نتولدو مرة مع عشرة الكتب ..
مع صفحات ماليتها حروف .. كل صفحة توصف ضروف لناس تعبها الضلم والشقاء .. لناس قتلها البرد تحرمت مالدفاء .. لناس تبيع في المراكب للهواء .. لناس فكرت غيرت و طفلة ميلت حيرت تباعت كي سلعة ..
نتولدو مرة مع تبسيمة و كلمة بتنغيما تخرجك من التركينة .. لا تخليك لا حزينة لا رزينة لا عاملة دهينة تع كذب ..
نتولدو مرة بعد مانموتو مرة ..
مرة و مرة والف مرة ..
الموت مرة .. و الولادة درة ..
تتبدل تغير تقوم ثورة منك عليك ليك ..
تقلع تربيطت يديك وساقيك و تسكيرة وذنيك تحل

عينيك وتقول انا عقلي موش عاطل وبدني موش غافل .. انا قلبي حديد انا إلي تولدت الف مرة ومرة من جديد ..

وصوت مطر خافت يرشرش .. في جواجيك يبربش .. يفركس في جواب لاسإلة تمرج في عقلك تهرش .. تهرب .. تغضب ..تغفل .. تغسل .. تقتل .. تقبل .. تفعل .. كلام مفرت لا فردة تشبه لأختها .. كلام يرشرش كي المطر .. و معنی الجملة في خطر .. ولا يسبب خطر .. مطر .. عصر .. قلبك عصر .. ثبت في حلاوة الليل و الغريبة كيف تصير و يملا حياتك الخير و للشيخة تميل و في الكلام تحير و مع صوت ترشريش المطر الطير الطير تتبل تتمرغد تتبهذل و تتغسل من الأفكار خايضة و تبسيمة غامضة و اصوات عاصفة و المعتقدات غالطة و الناس إلي في وجوه غيرها عاطسة ناطشا خشمها في السما عقلها تحت الف و الف وطا .. تنحي الغطاء و بهاك الغسلة تتمحی إنت القديم البهيم المصدد المندي المسوس .. و يتولد إنت لأقوی من الصخر في لعبة لمطر .. و ترجع تقول انا الي تولدت الف مرة ومرة من جديد ..

اكرام زغولي

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s